ഹിന്ദുസ്ഥാന്‍ കീ ജയ്‌

ഒരിക്കല്‍ നാസിമിന്റെ വീട്ടില്‍ സിനിമ കണ്ടുകൊണ്ടിരിക്കുകയാണ് നാസിമും രഞ്ജിത്തും പാക്കരനും. ഷാരൂഖ്‌ ഖാന്റെ "വീര്‍ സാര" ആണ് പടം. ഹിന്ദി വലുതായി മനസിലാവില്ലെങ്കിലും ഷാരുഖ് ഖാന്‍ ആയതുകൊണ്ട് കാണാമെന്നു വിചാരിച്ചാണ് നാസിമും രഞ്ജിത്തും ഇരിക്കുന്നത്. ഇതിനിടയില്‍ അവര്‍ മറ്റു പല കാര്യങ്ങള്‍ സംസാരിക്കുന്നുമുണ്ട്. എന്നാല്‍ പാക്കരന്‍ ബദ്ധശ്രദ്ധനായി സിനിമയില്‍ തന്നെ ലയിച്ചിരിക്കുകയാണ്. ഇവന് വല്ലതും മനസ്സിലാകുന്നുണ്ടോ എന്നറിയാനായി നാസിം പാക്കരനോട് ചോദിച്ചു, "എടാ ഷാരുഖ് ഖാന്‍ ഇപ്പോള്‍ പ്രീതി സിന്റയോട് എന്താ പറഞ്ഞത്?"

പാക്കരന്‍ മറുപടി പറഞ്ഞു "ഛെ! നിനക്ക് അത് പോലും മനസ്സിലായില്ലേ? നമ്മുക്ക് പാക്കിസ്ഥാന്‍ വിട്ടു ഹിന്ദുസ്ഥാനില്‍ പോയി താമസിക്കാം എന്നാണു ഷാരുഖ് ഖാന്‍ അവളോട്‌ പറഞ്ഞത് "

ഇത് കേട്ട് രഞ്ജിത്തും നാസിമും സ്തബ്ധരായി. "നിനക്ക് ഇത്രയും ബുദ്ധി ഉണ്ടോടാ പാക്കരാ??" നാസിം അമ്പരന്നു. രഞ്ജിത്ത് എന്നിട്ടും വിട്ടില്ല. അടുത്ത ചോദ്യം "പാക്കരാ...ഈ ഹിന്ദുസ്ഥാന്‍ എന്ന് പറയുന്നത് എവിടെയാണ് ?"

ഒരു നിമിഷം ഗൗരവമായി ചിന്തിച്ചിട്ട് പാക്കരന്‍ മുകളിലോട്ടു നോക്കി ഇടതു കയ്യിലെ വിരലുകള്‍ എണ്ണി തുടങ്ങി "ഇന്ത്യ ... പാക്കിസ്ഥാന്‍ ... ഉം ...പിന്നെ ... ശ്രീലങ്ക ... പിന്നെ ... അത് ... " കുറച്ചു നേരം കൂടി ചിന്തിച്ചിട്ട് പാക്കരന്‍ ഗൗരവത്തില്‍ പറഞ്ഞു " അളിയാ ... ഹിന്ദുസ്ഥാന്‍ ഇന്ത്യയുടെ അടുത്ത് എവിടെയോ ആണെന്നു എനിക്കറിയാം. കൃത്യമായിട്ട്‌ എവിടെയാണെന്ന് ഞാന്‍ മറന്നു പോയി..."

പൊട്ടിച്ചിരിയുടെ ഇടയില്‍ നാസിം രഞ്ജിതിനോട് പറഞ്ഞു "ഇപ്പോഴാണ് ആശ്വാസമായത്...ഒരു നിമിഷത്തേക്ക് പാക്കരന് ബുദ്ധി വെച്ചോ എന്ന് ഞാന്‍ അറിയാതെ സംശയിച്ചു പോയി !"